Jonathan MOYLAN (15 dec.)
La 3an dimanĉon de ĉiu monato 17:00 Sidnej-tempe (UTC+11)
BONVOLU RIMARKI: Sidnejo nun sekvas somertempon.
Se vi deziras partopreni, aŭ se vi mem volus prezenti ion, bonvolu sendi mesaĝon al:
prezidanto@esperanto.org.au
> Prelegserio de 2022
> Prelegserio de 2021
Programo
15 decembro 2024
Ĉu la financa industrio povas savi la planedon? – Jonathan Moylan (Aǔstralio)
Jonathan Moylan estas profesia ekologiisto, kiu laboras ekde dekkvin jaroj por diversaj internaciaj, naciaj kaj lokaj senprofitcelaj organizaĵoj, gvidante kampanjojn por lukti kontraŭ klimatŝanĝiĝo kaj ankaŭ konservi biodiversecon. Li ankaǔ fondis Novkastelan Esperanto-Societon antaǔ dudek jaroj (ĝi ne plu estas aktiva). Nuntempe li laboras por la Aǔstralia Fonduso por Konservado (ACF) kaj lia fokuso estas la transformigado de financaj organizaĵoj kiel bankoj kaj pensifondusoj. Evidente profitcelaj organizaĵoj ne povas bene ŝanĝi la mondon sen premo. Sed ĉu ili jam ŝanĝiĝas – kaj kiel uzi la potencon de popolaj kampanjoj por pli ŝanĝi ilin? Aperu kun via kuriozeco kaj viaj propraj ideoj.
Antaŭaj sesioj
17 novembro 2024
Laboro por rifuĝintoj – Rainer KURZ (Germanio)
Rainer esploris la situacion de rifuĝintoj en Germanio kaj prezentis sian krean projekton “Laboro por rifuĝintoj“. Por tio li gajnis prestiĝan germanan premion.
20 oktobro 2024
Diktaturoj kaj Esperanto – Ana ALEBIĆ-JURETIĆ (Kroatio)
En 72 jaroj de ĝia daŭrigo (1918-1991) Jugoslavio spertis du diktaturojn: la unua en la periodo 1929-1941, kaj (oni diras) la dua post la dua mondmilito, en la periodo 1945-1991. La du diktaturoj donis malsamajn kondiĉojn por Esperanto: dum la unua, Esperanto estis malpermesita kaj esperantistoj persekutitaj, kaj dum la dua, la ŝtato subtenis Esperanton, sed ne ĉiam finance. Tio estis la ora periodo por Esperanto, ne sole en Jugoslavio, sed tutmonde. Interese, du plej gravaj esperantistoj, kiu multe laboris por la rekono de Esperanto, alvenis el Jugoslavio: Ivo Lapenna kaj Tibor Sekelj.
15 septembro 2024
Dispartigo de pura akvo: Kio okazas ĉe vi? – Guy MARTIN (Francio)
Antaŭ 20 jaroj, kelkaj agrikulturistoj decidis kultivi maizon, kiu bezonas multe da akvo por kreski. Pro klimatŝanĝo, ili ne plu havas sufiĉe da akvo en riveroj aŭ boradoj. Do ili decidis konstrui akvorezervujegojn vintre, plenigitaj per boradoj. Sed, tiel mankas akvo en subtera akvonivelo kaj nur 5% de agrikulturistoj rajtas uzadi tiun konservitan akvon kiu somere vaporiĝas.
18 aŭgusto 2024, 16:45 (UTC+10)
“(Mal)konvena” informado pri Esperanto – Petr CHRDLE (Ĉeĥio)
Fama ĉeĥa esperantisto Petr Chrdle defios vin per surprizaj faktoj pri nia lingvo.
21 julio 2024
La eterna mondbildo de Martinus kaj Esperanto – Javier Romero TELLO (Hispanio)
Kiu estis Martinus? Kio okazis en lia vivo por akiri kosman konscion? Kaj kion li antaŭvidis rilate al la estonta mondŝtato kaj la estonta mondlingvo, Esperanto?
16 junio 2024
Armenio: Muzeo sub malfermita ĉielo – Araksaja ELBAKJAN (Armenio)
Iom da informoj pri antikva historio de Armenio, ĝia naturo, arkitekturo, arto kaj popolo.
19 May 2024
Olimpiaj Ludoj: Historio, faktoj kaj amuzaĵoj – Sandor HORVATH (Aŭstralio)
En julio 2014 la venontaj Olimpiaj Ludoj komenciĝos en Parizo. Sandor esploris historion de la antikvaj kaj modernaj Olimpiaj Ludoj. Vi aŭdos – aŭ eble eĉ revivigos – kelkajn specialajn momentojn, venkojn, perdojn kaj skandalojn.
21 Aprilo 2024
Brassens en Esperanto: Plu vivu Oĉjo Georgo! – Marcel REDOULEZ (Francio)
Georges Brassens (1921-1981) estis franca kanzonisto, konsiderata kiel eminenta poeto de la 20a jarcento. Diversloke tra la mondo multaj artistoj plu kantas liajn kanzonojn, des pli ke liaj tekstoj estas tradukitaj en multajn lingvojn. Kompreneble ankaŭ en Esperanton. Por honori la 100an revenon de la naskiĝtago de la artisto, La Kompanoj, kanta kaj teatra trupo de Esperanto-Gironde, loka E-grupo en Bordozo (sud-okcidenta Francio), kolektis, aktualigis kaj publikigis sesdek ses kantojn. Marcelo Redoulez estas la reĝisoro de La Kompanoj.
17 Marto 2024
Psiĥaj fenomenoj en brazila E-komunumo – Trevor Steele (Aǔstralio)
Volontula laboro en “Bona Espero” ŝanĝis la vivon de Trevor. Ekzistas nevideblaj fortoj same realaj kiel ĉiutagaj materiaĵoj.
18 Februaro 2024
Drakulo: Legendo kaj historio – Rodica TODOR (Rumanio)
Drakulo estas unu el la plej popularaj figuroj de ĉiuj tempoj. Sed kiuj estas liaj originoj? La legendo de Drakulo akiris mistikan aŭron pro la multaj superstiĉoj kaj kronikoj dum la Mezepoko, inspirante librojn, filmojn kaj teatraĵojn. Ankaŭ rilataj estas la rumana princo Vlad Țepeș (la Palisumanto), la romana ĉeffiguro, Bram Stoker, kaj eĉ ligoj kun la brita reĝa familio. Pri tiuj temoj la prelego donis kelkajn klarigojn.
17 Decembro 2023
Brno kaj la regiono Suda Moravio – Mirka kaj Jirka TOMEĈEK (Ĉeĥio)
Brno estas la verŝajna loko elektita por gastigi la Universalan Kongreson en 2025. Mirka kaj Jirka prezentis multajn interesajn aspektojn pri la urbo kaj ĝia ĉirkaŭaĵo, inkluzive de kulturo, historio kaj turismo. Brno estas dua la plej granda urbo en Ĉeĥio, kaj situas en la suda parto de la lando, kun bona ligoj al Prago, Vieno, Bratislavo, Budapeŝto kaj Katowice. La urbo estas konata pro sia etoso, bela arĥitekturo kaj riĉa kulturo. La regiono de Suda Moravio estas konata dank’ al vitkultivado kaj pitoreska pejzaĝo.
19 Novembro 2023
Blazonoj en Esperanto – Serĝo SIR’ (Francio)
Serĝo prezentis blazonoj kaj klarigis kial ne estas facile “heraldiki” en Esperanto.
15 Oktobro 2023
Mia vivo en Esperantujo – Ewald SCHICK (Aŭstrio)
Ewald estas longdaŭra esperantisto el Graz en Aŭstrio, kies patro estis esperantisto kaj komunisto. Ewald prezentis pri sia persona historio, la historio de la komunista partio en Aŭstrio kaj ankaŭ sia laboro kiel taksiŝoforo.
17 Septembro 2023
Greziljono: revo kaj realo – Guy MARTIN (Francio)
Guy esploris la historion de tiu speciala loko por la esperantistoj tra la mondo. Li klarigis kelkajn gravajn momentojn en la historio de la kastelo kaj ties ĉirkaŭaĵo, ĝia strukturon kaj la vizion por la estonteco.
20 Aŭgusto 2023
Okcidenta Saharo – Roger PRIETO (Portugalio)
Okcidenta Saharo estas konsiderata la lasta afrika kolonio. Post la hispana koloniigo, la teritorio estis okupita de Maroko, kaj granda parto de la orient-saharanoj fuĝis al la sudo de Alĝerio. Roger klarigis la historion kaj perspektivojn de tiu apenaŭ konata konflikto.
16 Julio 2023
La kolapso de Sovetunio – Trevor STEELE (Aŭstralio)
Trevor prezentis la historian kuntekston de tiu historia periodo, kiu fakte okazis dum li estis en Sovetunio.
18 Junio 2023
Klarnetoj kaj aliaj blov-muzikiloj – Serĝo SIR’ (Francio)
Serĝo prezentis sian blov-muzikilan kolekton, entenantan ĉefe klarnetojn, kaj klarigis kial la klarnet-familio entenas tiom da membroj (la plej multnombra el la blov-muzikilaj familioj).
21 Majo 2023
Julian Assange: heroo aŭ fiulo? – Sandor HORVATH (Aǔstralio)
Sandor esploris la vivon de Julian Assange, kaj la historion kaj gravecon de WikiLeaks.
16 Aprilo 2023
La okcitana lingvo – jOmO (Francio)
La fama kantisto jOmO prezentis la historion kaj la nunan staton de la okcitana lingvo. Li eĉ kantis en ĝi.
Memorfesto por MARCEL LEEREVELD
Verŝajne iam la plej aĝa esperantisto en la mondo, Marcel Leereveld, mortis la 21-an de marto 2023 je la aĝo de 105. La Aŭstralia Esperanto-Asocio mallonge prezentis lian vivon kaj poste ni petis la ĉeestantojn diri kelkajn frazojn pri iliaj memoroj pri Marcel.
19 Marto 2023
Monda muziko kaj danco – Helen PALMER (Aŭstralio)
La festivalo WOMAD (World Music And Dance) estas ĉiujara evento en la hejmurbo de Helen, Adelajdo, Sud-Aŭstralio. Ĝi ankaŭ okazas en kelkaj aliaj lokoj tra la mondo. Helen prezentas la historion de WOMAD kaj siajn spertojn dum tiu evento. Por ŝi, la festivalo estas tempo kiam ŝia parto de la mondo lernas ĝoje pri aliaj partoj.
19 Februaro 2023
“La KancerKliniko” (LKK) – Serĝo SIR’ (Francio)
Serĝo prezentis la historion de la satira revuo La KancerKliniko.